https://www.facebook.com/watch/?v=2535280969972104&extid=NS-UNK-UNK-UNK-IOS_GK0T-GK1C&mibextid=pFSxpt&ref=sharing طارق لابس طاگية دالمغرب خضرا وحمرا ومكتوبة فيها سمية لبلاد. ملتاحف الراية المغربية ودار شال مغربي. طارق فرحان وسعيد. تلاقاتو "كود" حدا التيران المستطيل اللي غادي يلعب فيه منتخب المغرب للعيالات بعد ساعة ونص من الان مع منتخب المانيا فاول ماتش للبؤات فمونديال استراليا نيوزلندا. اللي شاف طارق ضارب هاد الساعات فالطيارات ووصل غير هاد الصباح وبقى كيدور فالمدينة حتى وصلات الجوج باش يدخل للوطيل٬ غادي يتصور باللي السيد مهلوك. ابدا كلو نشاط وحيوية وموجد باش يشجع المنتخب. طارق قال ل"كود" باللي جا من اللوكسومبورگ لميبلورن "باش نشوف اول مشاركة للمنتخب المغربي فالمونديال". طارق كيف قال ل"كود" جا من المطار. تسنى الجوج. حط لحوايج فلوطيل وجا للتيران. حتى الماكلة خداها بعد ما سالى هاد الحوار مع "كود". غادي يسالي الماتش يدوز الليلة ويرجع للوكسمبورگ. طارق ماشي اي مشجع. هادا مجنون مسكون بالبلاد. بمنتخب لبلاد. براية لبلاد. كان معول يجيب ولادو الثلاثة اللي كلهم ما بين 10 سنين و12 سنة ولكن ما كتابش. عارف اللعابة ومتبع كاع الماتشات ديال لبلاد وشاف اش دارو فكأس افريقيا للامم اللي كانت فالمغرب. "باش شفت اش دارو فكأس افريقيا٬ تشجعت باش نجي نشوفهم" يقول طارق ل"كود". هاد المغربي ما بغاش يزگل حدث تاريخي بحال هادا "هادي اول مشاركة للمنتخب فالمونديال. داخلة فالتاريخ" طارق ما دارش حساب للفلوس. سولاتو "كود" واش هاد الماتش ديال المنتخب غادي يكون اغلى ماتش فحياتو رد وهو يبتاسم "پا دي تو. فسبيل المغرب ماشي مشكل". المشجع المغربي شرا بيي لهاد الماتش وماتش بمدينة پورت وهو الثالث اللي غادي يجمع المغرب ضد كولومبيا يوم 3 غشت. كان معول يرجع حتى لماتش كوريا الثاني نهار 29 يوليوز بمدينة اديلايدي "لكن ما لقيتش ليبيي. لقيت كلشي تباع" يشرح طارق ل"كود". طبعا بشوش بحالو كولو طاقة ايجابية كيتسنى المغرب يربح المانيا بجوج لزيرو "طبعا جوج لزيرو. علاش جينا باش يربح المغرب" يقول ل"كود". هاد المشجع عالم بوحدو. حالة من لمغاربة المسكونين ببلادهم. بوطنهم. برايتهم. ماشي بحال شي انتهازيين جايباهم شي قنواتنا المتخلفة. طارق شاف ماتشات المغرب كلها فمونديال قطر. زهق ليه ماتش الصبليون بسباب التذاكر. كان كيدير بحال اليوم ذهاب واياب من اللوكسمبورك لقطر. شاف ماتشات حتى اميكال للاسود. ديما حاضر. ديما مبتاسم. ديما موجد الراية رابط الفيديو
