كيليان مبابي نجم المنتخب الفرنسي توعت وموحال يلعب ضد تونس

كتحوم الشكوك حول مشاركة نجم منتخب فرنسا كيليان مبابي مع منتخب بلادو اليوم الأربعاء، ضد منتخب تونس فالجولة الثالثة من كأس العالم قطر 2022، بسبب الاصابة.
وكشفت قناة "RMC" الفرنسية هاد الصباح بلي كيليان مبابي توعت البارح فالتداريب وحس بشي ألم فالشوفية ديالو ملي كان فالحصة التدريبية الخاصة بالمنتخب الفرنسي اللي كتسبق الماتش ضد تونس، وبالتالي فالتواجد ديالو مع 11 لعاب ديال منتخب فرنسا اللي غادي يلعبو ضد تونس اليوم الأربعاء كيبقى مجهول، والفرص ديالو قليلة باش يلعب 90 الدقيقة.
للإشارة فكيليان مبابي ساهم بشكل كبير فتأهل المنتخب الفرنسي لثمن نهائي كأس العالم قطر 2022، سوا فالماتش الأول ضد أستراليا أو الثاني ضد الدنمارك وكانت اللمسة ديالو حاضرة بالأهداف والأسيست، والغياب ديالو إلى تأكد غادي يزيد من المتاعب ديال المنتخب الفرنسي والمدرب ديالو ديديي ديشون، حيث الفرنسيين من أكثر المنتخبات اللي حرماتو الاصابات من لعابا مهمين فهاد المونديال وفمقدمتهم كريم بنزيما أحسن لعاب فالعالم.