مدرب بلجيكا مرة يقول لكاكو يقدر يلعب ضد المغرب ومرة يقول ما لاعبش.. واش باغي يفاجأ الركراكي؟

كيواصل مدرب بلجيكا روبيرتو مارتينيز فالمحاولات ديالو لتمويه الناخب الوطني وليد الركراكي واللعابا ديال المغرب حول مشاركة المهاجم البلجيكي روميلو لوكاكو من عدمها غدا الأحد، فماتش المنتخبين فالجولة الثانية من كأس العالم قطر 2022.
روبيرتو مارتينيز مدرب بلجيكا اليوم السبت، فالندوة الصحافية اللي كتسبق الماتش كشف بلي اللعاب موحال يكون فالماتش ديال غد قال: "لوكاكو طبيا ماغادي يكون واجد حتى الماتش الثالث (ضد كرواتيا) وغادي نكملو فهاد البروتوكول ولكن راه تدرب 2 المرات مع المنتخب واليوم غادي نشوفو الحالة الصحية ديالو وما كنعتقدش غادي يلعب غدا.
ورجع روميلو لوكاكو كيتدرب هادي يومين مع المنتخب البلجيكي من بعدما غاب عليه فالماتش الأول بسبب الاصابة، وقال روبيرتو مارتينيز فتصريح سابق الخميس اللي فات بلي فحالة كان غادي يلعب ضد المغرب ما غاديش يبدا به من الأول، الشي اللي كيخلي الشكوك كتحوم على نية المدرب البلجيكي واش صادق فكلامو على لوكاكو ولا كيحاول يفاجئ الناخب الوطني وليد الركراكي.