لعاب مهم رجع للوداد وكيوجدوه قبل ما تبدا البطولة

رجع جلال الداودي يتدرب مع الوداد الرياضي من بعد أسابيع، غاب فيهم على الفرقة وفضل يدوزهم فأكادير باش يتعالج بسبب الاصابة اللي تعرض فماتش الحمرا ضد ريفرز يونايتد النيجيري فدوري أبطال إفريقيا.
وبدا جلال الداودي خدام فلبروكرام اللي وجدو له الطاقم التقني ديال الوداد الرياضي، وانطلق فالحصص التدريبية الفردية فتيران بنجلون فانتظار يدخل فتداريب المجموعة فالأيام اللي جايا.
وكيسعى الوداد الرياضي لاسترجاع جلال الداودي فأقرب وقت، باش يكون واجد يلعب ليماتش ديال الحمرا مع عودة منافسات البطولة الإحترافية اللي واقفة بسبب المونديال، حيث اللعاب مهم بالنسبة للفرقة.