الوداد واجد للديربي والهدف ديالو يربح ويرجع للصدارة

سالا الوداد الرياضي الاستعدادات ديالو لماتش الديربي اللي غادي يلعب غدا الأحد فستاد دونو ضد الرجاء الرياضي فمؤجل الجولة 6 من البطولة الإحترافية لكرة القدم.
وخاض الوداد آخر حصة تدريبية اليوم السبت فتيران بنجلون، وعرفت حضور جميع العناصر وركز فيها الحسين عموتة على وضع آخر اللمسات مع الطاقم التقني ديال الحمرا واللعابا تحضيرا للماتش، وسط أجواء من التركيز والمعنويات كانت مرتفعة ديال الكابيتان يحيى جبران وصحابو، اللي رجعو لوطيل من بعدما سالاو الحصة التدريبية باش يبقاو مركزين على الماتش.
وبالنسبة لغيابات الوداد فالديربي فغادي تعرف صفوف الحمرا غيابين فقط، وكيتعلق الأمر بجلال الداودي اللي موعت وعندو شهر ديال العلاج والراحة، وبديع اوك اللي تحصل على بطاقة حمرا فالماتش اللي فات ضد إتحاد طنجة.
للإشارة فماتش الوداد الرياضي والرجاء الرياضي غادي ينطلق غدا الأحد إبتداء من الساعة 4 عصرا فتيران المركب الرياضي محمد الخامس بالدار البيضاء، فماتش من المنتظر يعرف حضور كبير ديال جمهور الفريقين، مع العلم أن الحمرا غادي تبغي تربح باش تسترجع صدارة البطولة وتخلي الغريم الرجاء بعيد على مقدمة الترتيب.