ضغط كبير كيعيشو ريفرز النيجيري قبل ماتش الوداد واللعابا ديالو خايفين

كيعيشو اللعابا ديال فريق ريفرز يونايتد النيجيري ضغط بسبب ماتش الروتور اللي غادي يلعبوه ضد الوداد الرياضي الأحد الجاي، فستاد دونور ضمن إياب دور 32 من دوري أبطال إفريقيا.
وكشف اونوكا اللعاب ديال ريفرز يونايتد النيجيري فتصريح لموقع BBC، أن فرقتو عليها الضغط قبل ماتش الروتور ضد الوداد بالرغم من انها ربحت الألي، ووضح بأن الماتش فالمغرب غادي يكون صعيب وهو والزملاء ديالو عارفين شنو كيتسناوهم من جمهور الوداد فالمغرب.
اللعاب ديال ريفرز واللي عندو 23 عام أكد أن الفريق النيجري ماغاديش يلعب فقط ضد بطل إفريقيا فدونور، ولكن راه غادي يواجه أيضا الجمهور ديالو اللي مغاديش يجي للتيران فالماتش باش يضحك ولكن غادي يجي باش يربح.
ورغم الضغط والتخوف من جمهور الوداد والدعم الكبير اللي كيقدمو للحمرا، عبر اونوكا اللعاب ديال ريفرز يونايتد على التفاؤل ديالو وشدد على انه هو وصحابو غيتقاتلو باش يرجعو بالبيي ديال كاليفيكاسيون من المغرب إلى نيجريا.
وبالنسبة للوداد الرياضي ممثل كرة القدم المغربية فكيحتاج للرباح فماتش الروتور بهدف واحد لزيرو على الأقل باش يتجاوز الخسران ديال الألي ضد ريفرز يونايتد فنيجريا بهدفين لهدف واحد، يضمن التأهل لدور ليكروب من دوري أبطال إفريقيا ويواصل حملة الدفاع على اللقب اللي توج به الموسم الماضي.