ها بروكرام الوداد استعدادا لماتش الديربي

غادي يدخل الوداد الرياضي إبتداء من اليوم الجمعة فتجمع إعدادي استعدادا لمباراة الديربي ضد الرجاء الرياضي يوم الأحد المقبل فتيران المركب الرياضي محمد الخامس بالدار البيضاء، ضمن مؤجل الجولة 6 من البطولة الاحترافية لكرة القدم.
الوداد غادي يرجع لأجواء التحضير من بعدما استافدو اللعابا ديالو من يوم راحة البارح الخميس، وغادي يخوض حصة تدريبية اليوم الجمعة تحت إشراف المدرب الحسين عموتة فتيران بنجلون، ومن بعد منها غادي يتوجه الفريق، لواحد لوطيل فكازا باش يدخل فتجمع إعدادي حتى الأحد الجاي موعد الماتش، مع العلم أنه غادي يمشي يدير غدا السبت آخر حصة تدريبية قبل الماتش غادي تكون فتيران بنجلون ويرجع لوطيل.
للإشارة فالوداد الرياضي هو اللي غادي يستقبل ماتش الديربي الأحد الجاي، وعندو رغبة كبيرة فتحقيق الرباح على الغريم ديالو، وذلك من أجل العودة لصدارة البطولة وأيضا، باش يخلي الرجاء بعيد على مقدمة الترتيب.