ها جديد الحالة الصحية ديال حركاس مدافع الرجاء

خلفت الإصابة اللي تعرض لها جمال حركاس مدافع الرجاء الرياضي ضد فريق نيجليك من النيجر البارح السبت فماتش دوري أبطال إفريقيا، قلق كبيرة عند جماهير الخضرا وهادشي قبل مباريات مهمة للفريق من بينها ديربي كازا الويكناد الجاي.
مصدر مطلع كشف أن اللاعب ملي بدا كيتشكى من الإصابة، قرر الطاقم الطبي ديال الرجاء باش ما يغامرش بالسلامة ديالو، وهذا هو السبب اللي خلاه يغادر ماتش الفريق ضد نيجليك بشكل مبكر وتقريبا من بعدما دازات 20 دقيقة على بداية اللقاء، وأن الفحص الأول بين بلي اللعاب تصاب فالفخذ ديالو.
نفس المصدر أكد أن الإصابة ديال حركاس ما صعيباش لكن اللعاب غادي يدير فحوصات طبية اليوم الأحد، للكشف أكثر على الإصابة ديالو وتشخيصها بشكل معمق ثم تحديد مدة الغياب ديالو على الفريق، وأنه من المنتظر يغيب على الماتش الجاي ضد حسنية أكادير الأربعاء المقبل فمؤجل الجولة 5 من البطولة، فانتظار الحسم واش غادي يلعب ماتش الديربي ضد الوداد الأحد المقبل فمؤجل الجولة 6 أم لا.