إصابة لاعب جديد ديال المنتخب قبل المونديال

تعرض لاعب جديد ديال المنتخب الوطني المغربي لكرة القدم للإصابة، وهاذشي قبل أسابيع فقط من إنطلاق كأس العالم المقبلة لي غتقام فقطر شهر نونبر اللي جاي.
الأمر كيتعلق بالدولي المغربي جواد الياميق، اللي تلقى يوم أمس إصابة قوية فالماتش ديال الفريق ديالو بلد الوليد ضد فريق اشبيلية فالجولة الثانية من البطولة د إسبانيا.
جواد الياميق تصاب بعد الاحتكاك ديالو مع واحد من اللاعبين ديال اشبيلية فالثلث ساعة الأولى من الماتش، واضطر يخرج ومايكملش اللقاء بسبب الإصابة والحريق ديالها.
ومن المنتظر باش يخضع جواد الياميق للفحوصات الطبية فالساعات اللي جايا، من أجل تعرف نوعية الإصابة ديالو والعلاج والمدة الزمنية اللي غايغيب فيها على الملاعب.
للإشارة فجواد الياميق هو ثاني مدافع ديال المنتخب الوطني المغربي كيتصاب قبل نهائيات كأس العالم، فالمدافع ديال بلد الوليد الإسباني كينضاف لنايف أكرد لاعب ويستهام الانجليزي، اللي بدورو ماكانش محظوظ وتصاب قبل المونديال بالإضافة للنجم المغربي طارق تيسودالي اللي تحرم من المشاركة فالمونديال بسبب الإصابة.