كازا إيفنت غادي تسبب فعقوبة للوداد حيث ريفرز النيجيري تطفا عليه الضو فدونور وماتدربش – فيديو

تفاجأ فريق ريفرز يونايتد النيجيري بالضو طافي فتيران المركب الرياضي محمد الخامس فالدار البيضاء، مساء اليوم السبت، ملي بغا يدير الصحة التدريبية الأخيرة ديالو قبل ماتش غدا الأحد ضد بطل إفريقيا فدور 32 من دوري أبطال إفريقيا.
التيران كتشرف على التدبير ديالو شركة كازا إيفنت، وريفرز يونايتد النيجري مادارش الحصة التدريبية الأخيرة اللي كتسبق الماتش ضد الوداد الرياضي اللي هو المستقبل للماتش، والفريق النيجري كيدعي حسب ما نشر ففيسبوك، أنه ما تدربش فتيران المباراة حيث طفاو عليه الضو، وأن مندوب الماتش كان حاضر وزمم الواقعة.
وفحالة كان هادشي اللي كيدعيه فريق ريفرز يونايتد النيجيري بأنه تحرم من الحصة التدريبية بسبب الضو اللي طفا فالتيران، فغادي يكون الوداد الرياضي مهدد بعقوبة حيث هو المسؤول على تنظيم ماتش الروتور اللي فالميدان ديالو بدون ما يدير علاش، الذنب ديالو هو تقصير الشركة اللي مكلفة بالإشراف على تدبير الملعب.
وكان ريفرز يونايتد النيجيري وصل باش يدرب فدونور من بعد نهاية ماتش الرجاء الرياضي وفريق نيجليك من النيجر عن نفس الدور من عصبة الأبطال الإفريقية، وهو الماتش اللي بدا مع 6 ديال العشية وملي سالا كان الضو ديال التيران شاعل هذا يعني أنه إما المسؤولين ديال ريفيرز يونايتد النيجيري كيكذبو أو أن الشركة غلطت وطفات عليهم الضو بدون نية سيئة أو وقع شي عطب اللي تسبب فإطفاء الأضواء الكاشفة ديال التيران.
للإشارة فإدارة الوداد الرياضي برئاسة سعيد الناصيري وفورت استقبال فالمستوى لفريق ريفرز يونايتد النيجيري ملي وصل للمغرب، وعطاتو حتى حافلة الفريق الأحمر باش يتنقل من لوطيل لتيران التداريب، لكن هاذ الديبلوماسية الموازية اللي كيقوم بها فريق الوداد والرجاء وباقي ممثلي المغرب فالكرة الإفريقية كتضربو فالزيرو هفوات من شركة كيفما وقع فدونور هذا الليلة فحالة كانت ادعاءات ريفيرز يونايتد النيجيري صحيحة.
https://fb.watch/gaTW0grH_K/
https://m.facebook.com/story.php?story_fbid=pfbid02etLasp5RfN7RiDUwzfWLQnJGPxNZJmvcH9uFKRg9QgVuoXqwSF39SHfBCwkX7JsNl&id=100063709447079&sfnsn=mo&extid=a
https://fb.watch/gaUdj5pzFY/
https://fb.watch/gaUfabPKhO/
https://m.facebook.com/story.php?story_fbid=pfbid02etLasp5RfN7RiDUwzfWLQnJGPxNZJmvcH9uFKRg9QgVuoXqwSF39SHfBCwkX7JsNl&id=100063709447079&sfnsn=mo&extid=a