دوار ريب مدرسة وعاود بنى وحدة جديدة فاولاد شبانة.. والوزير بنموسى دشنها اليوم – تصاور

دشن شكيب بنموسى وزير التربية الوطنية زوال اليوم الجمعة مدرسة اولا اشبانة بدوار الحنافات قيادة راس العين الشاوية، اقليم سطات ،من بعد ما تعاودات من لول من طرف ناس الدوار. دارو اتصالات مع شركة العقار "سما انفيست" ورابت اللي كانت مصايبة من بريفابريكي وطلعات وحدة بالاسمنت المسلح
وشفنا اليوم بنموسى جا ومعه العامل ابراهيم ابو زيد ورؤساء المصالح الخارجية والبرلمانين ومدير الاكاديمية الجهوية الدار البيضاء سطات واباء وامهات التلاميذ إلى هذا المدرسة ،بحيت تم خلال هاد الافتتاح الاستماع لمكونات المدرسة كما اجتمع الوزير مع الاطر لي كتشتغل في المدرسة وسمع ليهم ولهمومهم.
وتم في لاخر تكريم گاع الناس لي ساهمو من قريب ولا من بعيد في اعادة بناء وتأهيل هاد المدرسة. هاد المشروع ديال اعادة تأهيل وبناء هاد المدرسة راه جا باش يحارب الهدر المدرسي.
بنموسى مني جا لقى التلاميذ باغين حتى تيران ديال الكورة باش يلقاو فين يلعبو وكيتمناو الوزارة تسمع ليهم وحتى المحسنين الى قدرو يعاونو شوية فهاد الشي.
وهاد البادرة مزيانة فالمغرب، حيت مكناش كنشوفو محسنين كيبنيو المدارس ولكن كيتسابقو غير على الجوامع وهذا راه فهم خاطئ ديال الاحسان، ماشي عيب نبنيو الجوامع ولكن العيب هو منديروش العمل الاحساني حتى في المدارس لي هي فضاء للتلامذ باش يقراو ويرسمو المستقبل.
هاد البادرة اكيد غادا تعاود حتى في بلايص اخرين..