مباشرة من بعد تحقيق "گود".. 4 شكايات وصلات للنيابة العامة فسطات ضد مول ال"فو كونط" المعروف بإسم "أوباما" اللي كيشهر بالأساتذة الجامعيين

من بعد التحقيق اللي دار موقع "گود" وفضح فيه مول ال"فو كونط" ديال "منعم زروال" اللي بان مباشرة بعد اعتقال الأساتذة المتورطين فقضية "الجنس مقابل النقط"، واللي طبعا دفعو منسق ماستر المالية العامة المسدود بسباب الخنز ديالو، واللي بان بأن الطالب الموقوف عن الدراسة بعد تقرير سوء السلوك ومعروف فالوسط الجامعي بلقب "أوباما".
مللي خرج مقال "گود" الفاضح والكاشف لهوية هاد الكونط المستعار ومولاه شاداه الخلعة. دبا تقدمو 4 أساتذة أمام وكيل الملك بالمحكمة الابتدائية بسطات بشكايات ضد هاد ال"فو كونط" اللي مسهم فالعرض ديالهم وشبع فيهم سبان بلغة خايب، كاتب أكثر من نصها واحد الموظف عمومي وداير الدكتوراه.
النيابة العامة من بعد هاد الشكايات خصها تتحرك تدير الادأبحاث ديالها في الموضوع لأن هاد البسالة والبلطجة الإلكترونية خصها تسالي.
ومباشرة من بعد ما فضحو "گود" مشى يجري حيد "الفو كونط" وقال حگا مشى ليا من إدارة "فايسبوك"، ومللي عطاوه سيادو الفتوى بللي ماخصوش يحيدو مشى دار واحد آخر بنفس السمية.
الغباء ديال هاد "أوباما" ماكينش بحالو حيت جا كيعاير فموقع "گود" بالكونط ديالو الأصلي والحقيقي واتاهم أساتذة جامعيين بتسيير الموقع، وناض بداك ال"فو كونط" دار كوبيي كولي لداك الكلام كلو.
هاد الفيلم ماغيساليش حيت مزال غادي نجبدو الضواصا ديال كيفاش نوضها مع الأستاذ (ع.ش) مللي بغى ينقل خوه اللي خدام فالوقاية المدنية وسط الامتحان، زيادة على أنه سجلو بالباك قديم وهو ماعندوش الحق كَاع.
الملف الخانز لاخور اللي كيحقق فيه موقع "گود "هو ديال كيفاش تسجلو مجموعة من الأسماء، اللي غاديين نشرو لائحتهم باش يتفتح تحقي، بالباكالوريا القديمة مقابل 2500 درهم، بتنفيذ من موظف حديث العهد بالوظيفة وهو إبن موظف قديم بالكلية واللي استامعات ليه الفرقة الوطنية للشرطة القضائية بالدار البيضاء فقضية تزوير النقط اللي مشى فيها الموظف من ذوي الاحتياجات الخاصة ومعاه طالب سابق وسيط.