كورونا اقتحمات أسواق السلام فقنيطرة.. إصابة حارس أمن بالفيروس أدى لإغلاق السوبر مارشي وإجراء التيست لعشرات المخالطين

خرجو النتائج ديال حارس أمن خاص فالسوبر مارشي ديال أسواق السلام فالقنيطرة إيجابية، وبسباب هذشي قررات المندوبية تجري اختبارات لعاملين خرين مشتبه بإصابتهم حتى هوما بالفيروس، واللي كيتقدر العدد ديالهم بالعشرات.
هذ المعلومة كشف عليها الحقوقي إدريس السدراوي، رئيس الرابطة المغربية للمواطنة وحقوق الإنسان، على الصفحة ديالو فموقع التواصل الاجتماعي "فيسبوك".
وأكد السدراوي، فتصريحو ل"كود"، بللي السلطات سدات أسواق السلام بعد ثبوت إصابة الحارس، وتم المحاصرة ديال جميع ابواب السوبر مارشي.
وقال بللي حارس الأمن كيسكن فمنطقة المهدية، وكان اشتغل كجندي سابقا.
وحاولات "كود" تتصل بمحمود برحال، مندوب الصحة فالإقليم، وكذلك عبد المولى بولمعيزات، المدير الجهوي للصحة فجهة الرباط سلا القنيطرة، لكن تيليفوناتهم بجوج مطفية.