الكمامات ماكاينينش فالصيدليات وخا صبحو اليوم إجباريين.. والحبابي ل"كود": مازال كانتسناو يزودونا بيهم

مجموعة من الصيدليات مازال ما جاوهوم الكمامات، فالوقت اللي اليوم صبحو إجباريين.
المواطنين اللي ماعندهمش الحق يخرجو من ديورهم إلا للضرورة القصوى، وممنوع عليه يبعدو بزاف على البلايص اللي كيسكنو فيهم، ماعرفوش منين يجيبو لكمامات، والفارماسيانات اللي قراب ليهم مافيهمش.
فتعليقو على هذشي، قال محمد الحبابي، رئيس كونفدرالية صيادلة المغرب، بللي الصيادلة ماتوصلو بحتى شي دفعة جديدة ديال الكمامات فالمغرب كامل.
الحبابي استغرب، فتصريحو ل"كود", كيفاش ليسوبر مارشي بوحدهم اللي كيتوفرو عليهم، فالوقت اللي الصيدليات ماعندهمش كَاع هذ الكمامات، وكيقضيو غير بالقدام.
وكاينين فارماسيانات قلال كيتوفرو على كمامات قدام من نوع آخر، كيبيعوهم ب2,5 للحبة حتى ل5 دراهم، وكيقولو بللي ماعندهمش خيار فهذشي لأنهم شراوهم بثمن طالع فالنهار اللول، وبللي النوع ديالهم مختلف على الكمامات العادية اللي السعر ديالهم تحدد ف80 سنتيم للوحدة.
وللإشارة، تقرر ابتداء من اليوم العمل بإجبارية وضع "الكمامات الواقية" بالمملكة، بالنسبة لجميع الأشخاص المسموح لهم بالتنقل خارج مقرات السكن في الحالات الاستثنائية المقررة سلفا.
ووضح بلاغ مشترك لوزارات الداخلية والصحة والمالية والصناعة بللي هذ القرار جا "من أجل اتخاذ الإجراءات اللازمة لتوفير الكمامات الواقية لعموم المواطنين بسعر مناسب".