علنات المديريات الجهوية للصحة فجميع الجهات فالمغرب، باستثناء جهة كازا سطات، على حالات الإصابة بفيروس كورونا المستجد فالأقاليم ديالها فهذ 24 ساعة الأخيرة، يعني من الستة ديال لعشية دلبارح الإثنين حتى للستة دالعشية داليوم الثلاثاء. اليوم سجلات جهة درعة تافيلالت أعلى عدد ديال الإصابات، بحيث سجلات 69 إصابة جديدة، وهذ الرقم المرتفع راجع لبؤرة الحبس ديال ورزازات اللي سجلات 66 إصابة، حسب بلاغ المديرية العامة لإدارة السجون وإعادة الإدماج، باش يوصل عدد الإصابات فالطوطال فالجهة ل155. كذلك سجلات اليوم جهة طنجةتطوانالحسيمة عدد كبير دالإصابات، اللي وصل ل43 إصابة، وهذشي راجع، حسب ما قال مدير مديرية الاوبئة والوقاية من الأمراض، فندوة اليوم مع الستة، لمجموعة من البؤر فالجهة، حيت تسجلات 14 لإصابة جديدة فجوج بؤر صناعية فطنجة (وصلات البؤر ل94 فالمجموع)، بالإضافة لتسجيل 14 إصابة جديدة فبؤرة صناعية فالعرايش (62 فالمجموع)، باش يوصل العدد الإجمالي للإصابات فالجهة ل426 إصابة. وبالإضافة لهذشي تكلم اليوبي اليوم على إصابات جديدة فبؤرة فكازا، وهذشي اللي خلا العدد الإجمالي دالإصابات فيها يطلع من 840 حتى ل855 إصابة، بلا مانعرفو المزيد من التفاصيل بخصوص الأقاليم الأخرى. وجهة فاس مكناس سجلات 17 إصابة بفيروس كورونا اليوم، 15 منها تسجو ففاس، وجوج فمكناس وتازة. واليوم تسجلو جوج وفيات فقط، بجوجهم تسجلو فمراكش اللي ما عرفات فهذ 24 ساعة اللخرة حتى إصابة جديدة. أما الجهات الاخرى فماسجلاتش شي جديد كبير، باستثناء تسجيل ارتفاع ملحوظ فعدد حالات الشفاء، وكل جهة ورزقها. أما بالنسبة للتفاصيل ديال الإصابات فالأقاليم، نتكلمو بعدا على جهة مراكش آسفي اللي كتجي فالمركز الثاني بعد جهة كازا سطات ب739 حالة مؤكدة، وهو عدد الحالات اللي ماتغيرش من لبارح لليوم، بالحق تسجلات كي قلنا جوج وفيات جديدة، باش يوصل عدد الوفيات ل38 وفات فالطوطال، وكذلك تسجو 6 حالات تعافي باش يوصل المجموع ل67 حالة، وبقات الإصابات موزعة على هذ الشكل: مراكش 470، الرحامنة 215، الحوز 26، شيشاوة 23، قلعة السراغنة 3، الصويرة 2، واليوسفية وآسفي 0 حالة. فالمركز الثالث كتجي جهة فاس مكناس اللي سجلات 17 لحالة جديدة، باش تبلغ فالمجموع 463 حالة، و24 ماتو بلا مايتسجلو وفيات جداد اليوم، و80 تشافاو. وبخصوص الحالات المسجلة فالأقاليم فتسجلات 297 ففاس، 100 فمكناس، 43 فتازة، 18 فإفران، 11 فصفرو، 7 فتاونات، 3 حالات فمولاي عقوب، حالة فالحاجب، و0 حالة فبولمان. فالمركز الرابع كتجي جهة طنجةتطوانالحسيمة اللي سجلات اليوم 43 إصابة جديدة، باش يوص العدد الإجمالي للإصابات ل 426 إصابة، منها 51 متعافين، و15 وفاة، وهذو التفاصيل: 293 إصابة بطنجة، 62 إصابة بالعرايش، 57 إصابة بتطوان، 13 إصابة بالحسيمةد إصابة واحدة بوزان، و0 إصابة بشفشاون. فالمركز الخامس، كتجي جهة الرباطسلا القنيطرة، اللي سجلات اليوم غير حالة وحدة جديدة، باش يبلغ عدد المصابين 281 إصابة، عدد الوفيات ماتغيرش واللي هو 10 وفيات، وحالات الشفاء طلعات ل115 لحالة، وبالنسبة للإصابات فالأقاليم فالرباط بلغات 119 إصابة، الصخيراتتمارة 81، سلا 50، القنيطرة 23، الخميسات 7، سيدي سليمان حالة واحدة، وسيدي قاسم صفر حالة. فالمركز السادس كاتجي الجهة الشرقية بعدما تزادت عندها 2 حالات إضافية اليوم، باش يوصل عدد المصابين فيها ل157 حالة مؤكدة، بالنسبة للوفيات فبقى العدد كيما هو واللي هو 8 دالوفيات، واللي تشافاو حتى هوما بقاو ف 16 حالة شفاء. بالنسبة للتوزيع: وجدة أنكَاد 56، الناظور 39، بركان 37، تاوريرت 9، كَرسيف 8، الدريوش7، وجرادة صفر حالة. المركز السابع جات فيه جهة درعة تافيلالت، بمجموع 155 حالة مؤكدة، وبالتالي تزادت فيها 69 إصابة من لبارح لليوم، وطلعات عدد حالات الشفاء ل22 فالمجموع، وبقا عدد الوفيات هو هو والي هو 2 حالات. أما بالنسبة للحالات المسجلة فكل إقليم الحالات فالأقاليم مسجلة 98 فورززات، 46 فميدلت، 5 فالرشيدية، 5 فزاكَورة، وحالة وحدة فتنغير. المركز الثامن من نصيب جهة بني ملال خنيفرة اللي تزادت فيها اليوم غير حالة وحدة، باش يوصل العدد الإجمالي ل62 حالة مؤكدة، كذلك تزادت حالة شفاء وحدة باش يوصل العدد ل13 حالات شفاء، أما الوفيات فبقاو ف6 حالات. وبالنسبة للحالات فعدد الأقاليم فتسجلات 25 فخريبكَة، 21 فآزيلال، 10 فالفقي بنصالح، 4 فبني ملال، وحالة وحدة فخنيفرة. المركز التاسع جات فيه جهة سوس ماسة اللي ماتبدل فيها والو من لبارح لليوم، بحيت بقات مسجلة فيها 47 حالة، منها 5 وفيات و13 واحد تشافا، وتوزعات هذ الحالات على أكادير إداوتانان ب22 حالة، إنزكَان آيت ملول ب18 حالة، طاطا ب4 حالات، اشتوكة آيت باها ب2 حالات، تارودانت بحالة وحدة، وتيزنيت ب0 حالة. فالمركز العاشر كتجي فيه الأقاليم الجنوبية اللي ما سجلات حتى شي جديد، جهة العيون الساقية الحمرا مسجلة أربع إصابات فإقليم بوجدور وكلها تعافات، ثم جهة الداخلة واد الذهب اللي مسجلة 2 إصابات فإقليم واد الذهب، تعافات منها حالة وحدة، وجهة كَلميم واد نون، اللي مسجلة حالة وحدة مؤكدة فكَلميم، وهذ الحالة تم الشفاء ديالها. و"كود" غتتكلف بتزويدكم بآخر المعطيات بخصوص أعداد الإصابات فالأقاليم فجهة كازا سطات، بالإضافة للإصابات فعمالة الدار البيضاء، مباشرة فاش تعلن عليها المديرية الجهوية. وبالنسبة للمجموع، محمد اليوبي، مدير مديرية الأوبئة والوقاية من الأمراض، علن فالندوة داليوم الثلاثاء مع الستة دالعشية على تسجيل 3209 حالة دالإصابة بكورونا فالطوطال، منها 145 وفاة، و393 واحد تشافا.
