وزارة الصحة دعات طبيب تطوان المصاب بالكورونا

فتحات المفتشية العامة لوزارة الصحة فتطوان تحقيق باش تحدد ظروف وتداعيات قيام واحد الطبيب عام انتحل صفة طبيب اختصاصي فواحد الكلينيك فالمدينة، وتبين من بعد أنه مصاب بفيروس "كورونا" المستجد، بعدما دار تحاليل مخبرية وخرجات نتيجتها إيجابية.
وحسب بلاغ دوزارة الصحة، اللي حصلات "كود" على نسخة منو، فالطبيب المعني كان برا المغرب، ومنين رجع بقى مستمر فالخدمة ديالو مع المرضى، ودار جوج عمليات جراحية، ومامتثلش للاحتياطات والقواعد المعمول بها للوقاية من تفشي الوباء، واللي من بينها بروتوكول حددو المندوب الإقليمي ديال الصحة باش يتبعوه الأطباء اللي رجعو من الخارج، باش إلى كان فيهم "كورونا" يكونو دارو جميع الاحتياطات باش ماينقلوهش للمرضى.
وبناء على هذ الواقعة، وحسب البلاغ، تسد الكلينيك بالإضافة للعيادة اللي كان كيزاول فيها هذ الطبيب الخدمة اللي كيدير، وتم رفع دعوة قضائية فالموضوع، وتوجيه تنبيه للمندوب الإقليمي دالصحة فالمنطقة بسبب الاهمال انعدام المسؤولية.
وزارة الصحة اعتبرات، فالبلاغ نفسو، بللي الطبيب ممتثلش للقواعد الأخلاقية المعمول بها، وعرض حياة الناس لوخرين للخطر، وانتخل صفة طبيب اختصاصي وقدم معلومات مغلوطة.