بسباب “كورونا”.. لوطيلات فالرباط مابقاوش كيقبلو الشينويين حتى يجيبو شهادة طبية

غردات ناشطة فموقع التواصل الاجتماعي “تويتر” كتقول بللي 10 ديال الشينويين رفضوهوم شي وطيلات فالرباط، وحبسوهوم فالباب حتى يجيبو شهادة طبية كتثبت أنهم فصحة جيدة.
وزادت المغردة كتقول بللي الشينويين ما كان قدامهم حتى خيار من غير أنهم يتوجهو كاملين للكلينيك اللي قريب للوطيلات، باش ياخدو شهادة طبية، ويقدموها للوطيل كحجة على أنهم مامقيوسينش بفيروس “كورونا”.
نشطاء على الموقع اعتبرو فالتعليقات بللي هذ الأمر عادي، وبللي لازم تتراقب الصحة ديال هذ الناس، خصوصا إلى كانو يالاه رجعو من الشينوا، فالوقت اللي اعتبروا وحدين خرين هذ الفعل غير أخلاقي، وكيشكل عنصرية كبيرة ضد الشينويين.