عرفات “كود” من مصادرها الخاصة بللي جوج مغاربة خدامين فالقنصلية العامة ديال بلدية كولومب ففرانسا جاتهم أعراض الإصابة بفيروس “كورونا” المستجد. وفتصريحها ل”كود”، قالت القنصل ديال قنصلية المغرب فالبلدية، اللي تابعة لإقليم “هو دو سان”، فجهة “إيل دو فرونس”، بللي هذ الجوج “تبين بللي فيهم أعراض المرض فعلا، كيكحو بزاف، وفيهم السخانة وحريق الراس، وعندهم جفاف، لكن فهذ المرحلة هذي صعيب تبان النتائج المضبوطة باش نعرفو واش مصابين فعلا بالفيروس ولا لا”. وأكدات القنصل بللي القنصلية دائما فاتصال مع هذ الجوج باش تطمان على حالهم، وبللي “درنا جرد لكَاع الناس اللي كانو معاهم، وطلبنا منهم باش حتى هما يديرو الحجر الصحي فديورهم، كيف حاولنا اليوم نعقمو القنصلية كاملة بالمبيدات والمعقمات باش نحيدو خطر انتشار الفيروس فصفوف الموظفين لوخرين، هذشي إلى كان فعلا”. وسبق للمغاربة دارو التحاليل قبل ومالقاو عندهم والو، “وهذ الفيروس ماشي ساهل يبان بالتحليلات، لانه يقدر يكون مازال ففترة حضانة واخا تبان الاعراض، ومنين تدوز هذ الفترة غايعاودو يديرو التحاليل”، كيف قالت. وتنشرات على نطاق واسع رسالة عبر تطبيق “الواتساب” كتأكد بللي المصابين بجوج فقنصلية كولومب مراض فعلا ب”كورونا”، وبللي النتائج ديال التحليلات طلعو إيجابية، وهذشي نفاتو القنصل وقالت بللي مازال ماعرفو حالتهم الصحية مزيان.
