آيت الطالب راسل مهنيي الصحة فالقطاع العام والخاص باش يحاربو “كورونا”

وجه وزير الصحة، خالد آيت الطالب، رسالة إلى مهنيي الصحة فالقطاع العام والخاص، باش يتجندو من أجل محاربة فيروس “كورونا” المستجد، باش مايتفشاش الوباذ فالبلاد.
وطالب آيت الطالب، فالرسالة اللي تعممات اليوم الجمعة على كَاع المديريات الجهوية للصحة، وحصلت “كود” على نسخة منها، الأطباء والممرضين وكاع اللي خدامين فالقطاع الصحي باش يعززو الوقاية فالمؤسسات الصحية للحفاظ على صحة المواطنين، واستعمال وسائل الحماية الفردية اللي وفراتها الوزارة حسب الإجراءات العملية للخطة الوطنية للرصد والتتبع ديال الفيروس.
وحث الوزير على ضرورة التواصل المستمر مع المواطنين، وتحسيسهم بضرورة الوقاية من العدوى والإجراءات الواجب اتخاذها، وطمأنتهم فهذ الوقت اللي كيسود فيه القلق والترقب.
وأكد بللي الوزارة عملات مع جميع المتدخلين على تعزيز المنظومة الوطنية على المراقبة الوبائية، والرصد والتصدي وعممات عدد من الدوريات والإجراءات العملية، وقامت بتحديث موقعها الرسمي.
وللإشارة فلحدود كتابة هذ الأسطر تسجلات 50 إصابة محتملة بإصابتها بالفيروس، 48 منها مستبعدة و2 حالات مؤكدة، وحدة فهذ الجوج فحالة حرجة.