بالفيديو. في الوقت لي المسؤولين والإعلام ناعس الشيف العالمي گوردن رامزي دار خدمة كبيرة للسياحة المغربية وعرف بمنطقة تازكا والنواحي لي منسية.. صور فيها وثائقيات على الطبخ فالمنطقة ودار ليها إشهار كبير بزاف

گوردن رامزي الشيف العالمي ونجم التيليفزيون زار منطقة تازة والنواحي واكتاشف المطبخ ديال هاد المنطقة المنسية والغنية بالثروات الطبيعية.
الشيف رامزي دار هاد المنطقة كلها وصور وثائقيات كتحتفي بجمالها وثرواتها وإستقابل ناسها وتقاليدها، هاد الحلقات لي غادي تدوز ف ناشيونال جيوگرافيك أميريكا راها إشهار كبير للسياحة فالمغرب، ويكفي تفاعل مئات الألاف مع المنشورات لي دار على منتزه تازكا فانستگرام.
هاد المنطقة المنسية هي وناسها، فيها جبل بويبلان لي مكيحدش منو الثلج العام كامل وهي منطقة سياحية زوينة بزاف ونقية ولكن للأسف بلا بنية تحتية والطريق ليها رايبة وكتقطع بالثلج، كذلك منطقة باب بودير ولي يمكن تعتابر منافس حقيقي لإفران فبالإظافة الى الثلج فموسم الثلوج المنطقة جات فالمتنزه الغابوي تازكا، لي بواحد الشوية ديال الإهتمام والإصلاح يقدر يولي متنفس سياحي حقيقي.
في الوقت لي المسؤولين والإعلام ناعس، گوردن رامزي دار خدمة كبيرة للسياحة المغربية وعرف بمنطقة زوينة بزاف ولكن منسية، غير هو للأسف الى قررو ناس خريين يزوروها من خلال الوثائقيات ديالو فراه غادي يتصابو بخيبة أمل ماشي لعدم جمال المنطقة ولكن للإهمال ولغياب البنية التحتية فيها، بحال بزاف ديال المناطق الزوينة فالمغرب ولكن المهملة.