كيفاش تجيبها روسية فخمسة أيام و بدون معلم

المغاربة منوضينها فرويسا، عطينها بوسان و تعناق للشهبات للي ما عارفينش آش بلاهم. شي تيڭول دارو لينا الشوهة، شي تيڭول خليهم يحلمو ما عمرهم يجيبوها روسية و لو أشرقت الشمس من مغربها. أنا تنڭول علاش لا؟ ماشي بداك المفهوم ديال فاش تيجي عندك شي دري صغير مخنن و كسول و تيڭول ليك “مني غادي نكبر غادي نولي رائد فضاء” و تتڭول ليه “علاش لا؟” باش ما تحطموش واخا عارف بللي ما عندوش كيدير ليها. راه فعلا يقدرو يجيبوها شهبة حيث المعطيات كتلعب فصالحهم.
فروسيا العدد ديال النساء كيفوت بزاف العدد ديال الرجال. من بين سن 15 عام حتى ل 64 عام، كاينين 46 راجل لكل 100 مرا. السبب الرئيسي هو الفودكا و السكرة المفرطة للي كتقتل الرجال فالمضاربات و الكسايد لدرجة العيالات تما كيعيشو 12 عام كثر من الرجال. هاد الشي كيأثر بشكل كبير على العلاقات بين الجنسين. بما أن الرجال العدد ديالهم قليل و كثير عليهم الطلب فالجواج، فراه كيديرو ما بغاو. الخيانة الزوجية تما ولات عادي حيث الرجال ما عندهمش علاش يحشمو و العانسات كيرميو العين على رجال صحاباتهم بلا حشمة بلا حيا، ديك الشي علاش الصداقة بين العيالات ما مقدساش فروسيا و للي ضبرات على شي واحد تتشدو بسنانها و تاتحضي جنابها. ڢلاديمير بوتين بروحو تصاحب و ولد مع واحد البطلة أولمبية قد بنتو و هو مازال مجوج، و ما تسوق ڭاع لصحة النفسية لشريكة العمر ديالو للي جاها انهيار عصبي فاش طلقها.
و حتى القوانين للي كتحمي العيالات تبدلات لصالح الرجال. العام للي فات، مجلس الدوما قرر أن الروسي للي ضرب مرتو بلاما يسيفطها لسبيطار ما كيستاهلش يغمال فالحبس، يكفي أنه يدوز جوج سيمانات فسيلول ولا يخلص ما يناهز 5000 درهم . و بعد المرات، المرا للي كلات العصى كتصدق هي للي مخلصة هاديك الغرامة حيث الدولة كتبزز عليهم يجبدو الفلوس من الحساب البنكي المشترك. حتى نسبة الموت بسبب العنف الزوجي مرتافعة عندهم بزاف، و كتمثل ثلاثة المرات المعدل الأوروبي. هاد الوضعية مخلية الروسيات مهووسات بالجواج و عاطينو أهمية كثر من تحقيق الذات و الاستقلال المادي. الروسية تقليدية بزاف فريها و ما عندها ما تدير بالفيمينيزم، كتفضل تكون زوينة و مهلية فراسها حيث عندها هاديك راه تاهيا خدمة كتضمن ليها مستقبل. إلى تفرجتو فالبرامج الوثائقية للي كتطرق لموضوع الجواج بين جنسيات مختلفة، غادي تلاحظو بللي تيكونو ديما فيهم بزاف ديال الروسيات حيث طلعو ليهم رجالهم فكرهم و فهمو بللي خاصهم يهاجرو إلى بغاو شريك حياة كيعاملهم بحال بنادم ماشي بحال خصم في الفنون الحربية.
إذن الروسية مني غادي يجي عندها مغريبي مدلي ريوڭو عليها و كيبوسها و يعنقها و كيعاملها بحالا أحسن حاجة طرات ليه فحياتو، و عرفات بللي عندو باش يصرف عليها، علاش غادا تصدرو؟ واخا حنا المغربيات كيجيونا هادوك كائنات بوزبالية، الروسية ما عندهاش إطار مرجعي باش تقارن، و للي كيجينا حنا موسخ تيبان ليها هي سمر و إيڭزوتيك. تماما كيفما المغربيات كيتصاحبو بفرانساويين ملڭين و مقودة عليهم و لكن كيجيوهم غزالين حيث بيضين و عينيهم زرقين. و زيد عليها أن المغربي كيولي فجأة حضاري مني كيجيبها ڭاورية، ديك تابوزباليت كيديرها غير على بنت بلادو.