عبوب: ما نستاهلوش نخسرو مع الرجاء.. ما غنهضرش على التحكيم والهدف اللي ماركينا فيه الشك

أكد زكرياء عبوب مدرب أولمبيك آسفي أن الفريق ديالو ما كانش يستاهل يخسر مع الرجاء الرياضي فالماتش اللي جمع الفريقين اليوم الاحد فبرشيد، ضمن الدور 22 من منافسات البطولة الاحترافية.
وهضر زكرياء عبوب بعد خسارة أولمبيك آسفي مع الرجاء الرياضي بزّز بهدف واحد لزيرو، وقال فتصريح له: "الرجاء لعبو الكل للكل وعندهم لاعبين بإمكانيات مزيانة وحنا لعبنا على المرتدات وكنا نماركيو ولكن ما قدرناش".
وكمل زكرياء عبوب: "ملي كيجيوك فرص فيحال هاد الماتشات خاصك تماركي حيث ما غتجيكش 40 كورة مع الرجاء، غتجيك 3 أو 4 الكواري خاصك تماركيهم.. أنا ما غنهضرش على التحكيم ولكن كيبقى شك فالهدف اللي ماركينا، وأنا مغندخلش فهادشي ولكن على الأقل اليوم كنا نخرجو بتعادل".