أسفي ربحو ليفار ودارو المزيان مع الرجاء وبركان وحتى الوداد اللي منافسين على صدارة البطولة

وقفو أولمبيك اسفي بقيادة المدرب الشاب زكرياء عبوب النجم السابق للرجاء الرياضي، (وقفو) فريق الجيش الملكي وربحوه اليوم السبت فتيران المسيرة الخضراء فأسفي، ضمن الدورة 9 من البطولة الاحترافية.
وسالا الماتش بين اولمبيك اسفي والجيش الملكي لمصلحة العبديين بنتيجة واحد لزيرو، وتسناو اسفي حتى للشوط الثاني فين قدرو يماركيو هدف الرباح بواسطة هابا بونيفاس فالدقيقة 56، مع العلم ان ليفار كملو الماتش بنقص عددي بعد طرد عبد الفتاح حدراف فالدقيقة 75، والماتش غاب عليه المدرب ديالهم التونسي نصر الدين نابي حيث مات له الأب ديالو.
اولمبيك اسفي بالرباح ديالهم على ليفار خداو 3 بوان مهمة رفعو بها رصيدهم إلى 12 نقطة، وطلعو إلى المركز 9 مؤقتا، وشعلوها على صدارة البطولة، وعطاو كادو لمنافسين ليفار الرجاء الرياضي ونهضة براكان اللي متقاسمين معهم الصدارة دابا برصيد 17 نقطة، وكذلك مع الوداد الرياضي اللي عندهم 3 الماتشات مؤجلين في انتظار يلعبوهم.