الحزن طاغي فالكوت ديفوار على إقصاء الأسود: المغاربة كيدورو فحال اليتامة فالمدينة والإيفواريين كاعيين

كتعيش مدينة سان بيدرو الإيفوارية أجواء من الصدمة والحزن بسبب إقصاء المنتخب المغربي من ثمن نهائي كأس إفريقيا، بعدما خسرو الأسود مع جنوب إفريقيا البارح الثلاثاء فتيران لورن بوكو.
صبحت شوارع مدينة سان بيدرو فين گالسين المنتخب المغربي والجماهير المغربية خاوية عكس ما كانت عليه الايام اللي فاتت، وحتى الإيفواريين مقلقين بزاف حيث المنتخب المغربي ودع المسابقة.
وانت كدور فالشوارع والسواق ديال مدينة سان بيدرون، كتحس بلي اليوم ماشي بحال الايام اللي فاتت، حيث كاينة واحد موجة ديال الحزن وخيبة أمل كبيرة، بسبب إقصاء المغاربة من كاس إفريقيا.
المغاربة خارجين كيتقداو المنتوجات اللي معروفة بهم الكوت ديفوار، بحال العسل والكاجو والكاكاو والحوايج، وكتبان فعينيهم خيبة أمل كبيرة وما مسروطاش لهم أنهم تقصاو، وخرجو من المسابقة بكري عوتاني، بعدما كانوا مرشحين يربحو كوب دافريك.
الحزن المغربي فسان بيدرو كاين معاه مواساة كبيرة من الإيفواريين اللي فينما كيتلقاو مع شي مغربية أو مغربي كيقولو له ميرسي گراس أفو راه حنا تأهلنا، وكيتأسفو حيث الماروك خرج من المسابقة.