المغاربة والإيفواريين محيحين فسان بيدرو: التوني والدرابو المغربي فكل بلاصة وكلشي غادي للتيران يشجع الأسود ضد جنوب إفريقيا (تصاور)

كتعيش الكوت الديفوار وبالضبط مدينة سان بيدرو اللي فيها لاعب المنتخب المغربي ضد جنوب إفريقيا اليوم الثلاثاء، ضمن ثمن نهائي كوب دافريك، أجواء مغربية وكلشي اللي فيها عاديين للتيران يشجعو المنتخب الوطني المغربي.
ومن صباح اليوم الثلاثاء، والمغاربة والإيفواريين خالقين أجواء ديال الاحتفال فالشوارع والقهاوي هنا فسان بيدرو، وناشطين ومحيحين بالأغاني المغربية والتشجيعات للمنتخب المغربي، وسط تفاؤل كبير بالرباح على جنوب إفريقيا والتأهل إلى ربع نهائي كوب دافريك.
الايفواريين كيحماقو على المغرب وكلهم كيقلبو على التوني المغربي وملي كتخرج لشوارع سان بيدرو كيسولوك فين يلقاو المايو د المغرب، وكيأكدو انهم باغيين يشجعو المغرب وكيحسو براسهم مغاربة وكيبغيون الماروك والملك محمد السادس والشعب المغربي وانه بفضل المغربي وصلو لربع النهائي.
ومن المتوقع يكون حضور كبير للجماهير اليوم الثلاثاء فستاد سان بيدرو بين المنتخب المغربي وجنوب إفريقيا، كيفما كان فماتش المغرب وزامبيا اللي حطم الروكور ديال هاد الكوب دافريك بكثر من 15000 متفرج، واليوم راه المغاربة والإيفواريين كاملين ورا الأسود باش يربحو ويتكاليفاو لربع النهائ