حملت جماهير الرجاء الرياضي التعادل اللي طاح فيه الفريق اليوم الاحد مع المغرب الفاسي فتيران فاس، برسم الدور 3 من منافسات البطولة الاحترافية، للمدرب الالماني جوزيف رينباور والطريقة اللي سير بها المباراة. وعبرت جماهير الرجاء الرياضي عن غضبها بسبب تعادل الفريق مع المغرب الفاسي، واعتبرت أن المدرب جوزف زيباور هو المسؤول الأول والرئيسي فتعادل الفريق أمام المغرب الفاسي، بالاختيارات ديالو واللاعبين اللي دخل فالتشكيلة الأساسية للمباراة. وتساءلت جماهير الرجاء، على شنو السبب اللي مخلي زينباور يعتمد على لاعبين كانوا فالفريق خلال الأعوام اللي فاتو ويزيد يتيق فيهم حتى لدابا واخا ما بينوش الكفاءة ديالهم، وما يلعبش فالتشكيلة الأساسية اللاعبين اللي جابهم النادي خلال الميركاتو الصيفي الأخير. الرجاويين على مواقع التواصل الاجتماعي، أكدو أن زينباو ما عندو فين يهرب هذه المرة من المسؤولية فالتعادل مع الماص، وتضييع 2 نقاط جداد بعدما ضيع الفريق 2 نقاط فالماتش الماضي أمام ليفار، وأنه ما عندو فين يتخبا دابا بعدما دار السبا ملي تعادل مع ليفار بالحمرا اللي خذا المدافع الرجاوي عبد الله خفيفي فهذاك الماتش. جماهير الرجاء الرياضي عيبو كذلك على المدرب جوزيف زينباور، القراءة المتأخرة ديالو فالماتشات، اللي نفعت الفريق مرة وحدة هذا الموسم فاش كان قلب النتيجة على يوسفية برشيد فالدورة الأولى وربح بثلاثة لواحد، بعدما كان خاسر بواحد لزيرو، فالوقت اللي خاص الرجاء هو اللي ديما ياخذ المبادرة بالنظر للإمكانيات الكبيرة اللي عندو واللاعبين اللي جايب، ويكون سباق للتسجيل على الخصوم، وهذا الشي اللي ما وقعش فماتش المغرب الفاسي. وحتى لدابا، حقق الرجاء الرياضي تحت إشراف المدرب الألماني جوزيف زينباور، رباح واحد فبطولة هذا الموسم كان على يوسفية برشيد بنتيجة 3 لواحد، وتعادل مع ليفار بجوج لجوج وبعدها مع الماص فماتش اليوم الاحد واحد لواحد، وعند الفريق 5 النقاط دابا كيحتل بها المركز الرابع، والرجاويين خايفين من هاد الانطلاقة المعكلة فها الموسم، خصوصا وأن الفريق لاعب غير على البطولة وكأس العرش هذا العام وخاصو يربحهم، والثقة ديال جماهير الخضرا فالمدرب جوزيف زينباور بدات كتنقص دابا.
