مازال كيحاولو الرجاء الرياضي يلقاو حل لأزمة مدافع وسط فالفريق، حيث الألماني جوزيف زينباو مدرب الفريق ما مقتانعش بمستوى دفاع الخضرا بعدما لعب الفريق 2 ماتشات فالبطولة مع يوسفية برشيد والجيش الملكي واستقبل 3 أهداف. رحيل جمال حركاس إلى الوداد الرياضي مخلي فراغ فدفاع الرجاء الرياضي، مازال معرفوش الرجاويين واش عبد الله خفيفي غيغطيه أو لا، وزاد الضغط خصوصا بعدما تطرد خفيفي فماتش ليفار، وهذا الطرد راه أكد زينباور على أنه السبب اللي خرج على الرجاء فالماتش وخلالهم يساليو متعادلين 2 لجوج. وحسب مصادر مطلعة، فالرجاء الرياضي برئاسة محمد بودريقة باغيين يسنيو مع مدافع مزيان وعندو تجربة اللي وقف ديفونس الفريق، وعينهم على زهير فضال الدولي المغربي اللي سبق له لعب فالبطولة مع الفتح الرياضب وفأوروبا مع عدد من الأندية بريال بيتيس الإسباني وسبورتينك لشبونة. الرجاء قدمو عرض باش يسنيو مع زهير فضال، والقيمة ديالو 200 مليون سنتيم، ولكن اللاعب المخضرم مول 33 عام، باغي 400 مليون مقابل أنه يسني مع الخضرا، وهذا الشي اللي كيصعب مهمة بودريقة والمكتب ديالو فالتعاقد مع اللاعب، وهذا الشي قبل 3 فقط عن موعد إغلاق الميركاتو الصيفي الحالي، اللي غيتسد السبت الجاي مع 12 الليل.
