شعلات فكروب المغرب د مونديال العيالات: كولومبيا ربحت ألمانيا فماتش سخون واللبؤات كيتسناهم ماتش قاصح

شعلات فالكروب 5 ديال كاس العالم للسيدات 2023، اللي فيه المنتخب المغربي، بعدما خسرات ألمانيا مع كولومبيا اليوم الأحد ضمن الجولة الثانية من البطولة المقامة بأستراليا ونيوزيلاندا.
وسالا الماتش بين ألمانيا وكولومبيا بجوج لواحد للكولومبيات، وسجل المنتخب الكولومبي هو الأول بواسطة ليندا كيسيدو فالدقيقة 56، والألمانيات جابو التعادل بواسطة الهدافة أليكسندرة بوب فالدقيقة 89 من بيلانتي، لكن إلحاح الكولومبيات على الرباح خلاهم يماركيو الهدف الثاني د الرباح فالوقت بدل الضائع من الماتش بواسطة مانويلة فانيكاس.
هذا الرباح مكن المنتخب الكولومبي ياخذ 3 بوان رفع بها الرصيد ديالو إلى 6 النقاط وتصدر لكروب 5، أما ألمانيا بقات عندها 3 بوان ورجعت إلى المركز الثاني، ومن وراها كيجي المنتخب المغربي ثالث بنفس عدد النقاط اللي هو 3 بوان، ثم كوريا الجنوبية أخيرة برصيد 0 نقطة.
وغيلعب المنتخب المغربي ماتش حاسم أمام منتخب كولومبيا الخميس الجاي، ضمن الجولة الثالثة من دور المجموعات، وعندو حل واحد هو يربح باش يتأهل إلى ثمن نهائي كاس العالم للسيدات.