الخلاف بدا.. زعيمة "سومار" ردا على مرشحتها الثالثة لي تاهمات المغرب بالتجسس على سانشيث: ما موافقاش على هاد الهدرة وما بغاش نتكهن بشي حاجة ماشي رسمية

Elouali.zaz.1987@gmail.com
الخلاف بدا واضح فائتلاف "سومار" لي كتقودو يولاندا دياز، المرشحة لرئاسة الحكومة فانتخابات 23 يوليوز بإسبانيا، وهادشي بسباب التعاطي مع العلاقات مع المغرب وأيضا نزاع الصحرا، وخا الائتلاف أكد أنه ضد موقف بيدرو سانشيث ومع البوليساريو.
اليوم زعيمة الائتلاف، يولاندا دياز، بينات بشكل واضح هاد الخلاف، بحيث علقات على تصريحات سابقة على المرشحة رقم 3 فالحزب المنحدرة من مخيمات تندوف، تكبر سيدي، ولي كانت قالت قبل أن المغرب ممكن يكون تجسس على رئيس الحكومة الإسبانية بيدرو سانشيث، وربط القضية بدعم الحكومة لمبادرة الحكم الذاتي.
يولاندا دياز ما عطلاتهاش فتصريحات صحافية ل"لاسيكستا"، وقالت أنها لا توافق على داكشي لي قالت تكبر سيدي، مشيرة أنها ما باغياش تتكهن ولا ترجح أي فرضية حول أي سياسي أو أي شخص حتى تكون شي حاجة رسمية، وفنفس السياق أضافت أن إئتلافها موقفو واضح من الصحرا ومتعلق أساسا بالدفاع عن "تقرير المصير" وفقًا لقرارات الأمم المتحدة.
"سومار" موقفو واضح من نزاع الصحرا، ولكنه ما سدش الأبواب فوجه علاقاتو مع المغرب، وذلك من خلال تعيينو للسفير الإسباني لدى الأمم المتحدة، أوغستين سانتوس مارابير، لي كيقولو أنه موالي للمغرب فالرتبة الثانية، ورجّع تكبر سيدي لي من تندوف فالمرتبة الثالثة بعدما كان مقرر تكون هي الثانية.