مانشستر يونايتد اتفق مع سفيان أمرابط وفيورنتينا باغيين 30 مليون أورو

كشف الإعلام الإيطالي على آخر مستجدات الدولي المغربي سفيان أمرابط، وأن اللاعب صبح قريب من الانتقال إلى البطولة الإنجليزية، وبلي مانشستر يونايتد هو اللي قريب يفوز بالخدمات ديالو.
وحسب شبكة "راي سبور" الإيطالية، فمانشستر يونايتد الإنجليزي قدر يقنع سفيان أمرابط، واتفق معه على شروط شخصية من بينها يدوبل له الصالير اللي كياخذ دابا من عند فريق فيورنتينا الإيطالي.
نفس المصدر، وضح بلي فيورنتينا الإيطالي فريق سفيان أمرابط اللي ما زال له عام معه، حيث العقد ديالو ما غيسالي حتى لصيف 2024، باغي مبلغ 30 مليون أورو مقابل التنازل عن خدمات الكلادياتور المغربي.
وكان حلم سفيان أمرابط يلعب مع البارصا الإسباني، وضغط خلال الميركاتو الشتوي الماضي على فيورنتينا باش يمشي له، ولكن ما قدرش والبارصا قلبو وجههم هذا الصيف، واللاعب مهتمين به كل من أتلتيكو مدريد الإسباني وميلان الإيطالي وبايرن ميونيخ الألماني.