أمرابط كان غيلعب فالبارصا على قبل ميسي

كان فريق برشلونة الإسباني معول يجيب النجم المغربي سفيان أمرابط هذا الصيف، باش يعاون الأسطورة الأرجنتينية ليونيل ميسي اللي كانوا المسؤولين د الفريق الكتالوني معولين أنه يرجع يلعب معهم، وهذا الأمر ما وقعش وبالتالي هذا الشي غيخلي النجم المغربي حتى هو ما يلعبش مع البارصا، ويمشي ينتقل لفريق آخر بحال أتلتيكو مدريد اللي هو دابا أكبر فريق مرشح يلعب معه.
وحسب موقع "سبور كتالونيا" الإسباني القريب بزاف من البارصا والمتخصص فالأخبار ديال الفريق، فمدرب برشلونة تشافي هيرنانديز كان معول يلعب الأرجنتيني ليونيل ميسي ورا المهاجمين، وبالتالي غيحتاج لاعب فوسط التيران بقوة بدنية ومزيان فالصراعات والثنائيات واحسن خيار كان عندو هو النجم المغربي سفيان أمرابط لاعب فيورنتينا الإيطالي.
نفس المصدر، أكد أن البارصا تراجع على صفقة سفيان أمرابط حيث ليونيل ميسي قرر ما يلعبش مع الفريق، ويمشي يحترف فالميريكان مع إنتر ميامي، وهذا الشي جعل البارصا يبدلو الخطة ديالهم ويبعدو على أمرابط، ويمشيو يقلبو على لاعب بمواصفات أخرى وهذا الشي لقاه فالألماني كوندوكان اللي جابو فابور من مانشستر سيتي الإنجليزي.