محدها تقاقي وهي كتزيد.. النصاب الخطير اللي خدا فلوس صحيحة من مرا ففاس بعدما وعدها بالزواج لقات عندو "لابيجي" بطاقة مزورة ديال الصحافة وطلع روشيرشي

حصلت "كود" على معطيات مثيرة حول النصاب الخطير اللي دارها بسيدة تعمل في إحدى الوحدات الصناعية في مدينة فاس، وخدا ليها فلوس صحيحة بعدما أوهمها بالزواج، قبل أن يختفي عن الأنظار.
وذكرت مصادر "كود" أن النصاب اللي تشد بمدينة بوسكورة بعد تنسيق بين المصلحة الولائية للشرطة القضائية ونظيرتها بكازا اطلع مبحوث عنه على الصعيد الوطني من طرف مصالح الدرك الملكي بمراكش في قضية تتعلق بإصدار شيك بدون رصيد.
وقالت المصادر أن عملية التفتيش التي أخضع لها الموقوف بينت أن هذا الأخير عندو جريمة أخرى من غير النصب هاد السيدة. فحسب مصادرنا فإن البوليس لقاو عندو بطاقة مزورة للصحافة يحتمل أنه كان يستعملها في تنفيذ عمليات إجرامية.
دبا الضحية تم الاستماع إليها قبل ثلاثة أيام في محضر قانوني من طرف الشرطة القضائية، كما تم الاستماع إلى النصاب اللي غادي يتقدم لوكيل الملك لدى المحكمة الابتدائية في الساعات المقبلة.
المصادر نفسها أشار إلى أن هاد النصاب تشد بشي طوموبيل كراها من كازا وفيها نظام "الجي بي إس". هاد النظام ساعد البوليس باش يشدوه بالزربة، علما أنهم دارو مجهود كبير بزاف باش يوصلو لهاد النصاب.
الموقوف كان خدا، حسب مصادر "كود"، شي 3 مليون من هاد السيدة. خدا ليها هاد المبلغ المالي بداعي باش يشري ليها شي منزل بحي المرجة وجعله بيتا للزوجية، بعدما جا لفاس وخطبها من عائلتها بالطريقة التقليدية.