دعم العلف. كيفاش المدير الجهوي للفلاحة بكازا مضارب على تطبيق القانون وشي مديريات اقليمية مخلية الفلاحة بلا نقل بلا ترانسبور

قضية توزيع الشعير المدعم من طرف وزارة الفلاحة بمنطقة اولاد مراح التابعة لاقليم سطات فيها مشكلة كبيرة. فلاحة بعد ما مشاو لسطات٬ دازو باش يخلصو وباش كيخلصو السيد اللي مكلف بلخلاص ما كيقولش ليهم راه الترانسبور داخل فالثمن.
حسب شهادات فلاحة ل"كود" "غير خلصنا ما قال لينا والو. سولناه على التراسبور وباللي داخل فالثمن٬ عاد رد علينا: اه راه خاصكم تسناو ووو"
مصادر "كود" اكدات باللي لقات مشاكل فنقل الشعير المدعم من مكان تواجد المستودع لي واضعين فيه الشركة "ديما كم " لي تملكا ولد زروال لي تتواجد الفرع ديالها بحي الهرية ببلدية اولاد مراح او هاينان٬ ممثل الشركة تقول الناس خلص او جيب وسيلة النقل.
دابا كون ما كانش هاد الفلاح على بال عارف حقوقو كون تقولب كيف وقع لفلاحة فراس العين.
هاد الشي تأكد ف"كود" بعد الاتصال بالمديرية الجهوية للفلاحة بجهة كازا اللي المقر ديالها فالجديدة. المدير ديالها النايلي مقابل هاد التوزيع وصارم فتطبيقو. حاضي ولكن شي مديرين اقليميين مع شي موظفين عوض ما يطبقو القانون كيتاصلو برؤساء جماعات عندهم مصالح معاخم باش يتشكاو من تصرفات شي فلاحة واتصالهم بالمديرية الجهوية.
هاد الشي راه ماشي ديال اللعب. الفلاحة خاصهم الشعير المدعم يوصل ليهم لخيامهم كيف قال وزير الفلاحة والصيد البحري.
المديرية الجهوية فهاد الدوسيي خدامة مزيان ولكن الصابوطاج كيجي من شي مسؤولين جهويين