أشرف حكيمي: ما كناش نعرفو المغاربة غادي يفرحو بنا لهاد الدرجة وشرفنا لقاء سيدنا

عبر الدولي المغربي أشرف حكيمي على السعادة ديالو بالاستقبال اللي لقاو فالمغرب من بعد الإنجاز اللي حققوه فكاس العالم قطر 2022، بالوصول إلى نصف النهائي واحتلال المركز الرابع بالبطولة.
وقال أشرف حكيمي فتصريح لقناة "الرياضية" من بعد احتفال الجمهور المغربي به وصحابو فالمنتخب وتوشيحهم بأوسمة ملكية من الملك محمد السادس: "ما كناش كنتظرو أن الإنحاز ديالنا فكأس العالم غادي يكون عندو هاد الأثر الكبير وحنا فرحانين حيث الشعب المغربي فرحان وهادشي كيموتيفينا باش نواجهو التحديات، وتشرفنا بلقاء الملك وهو اللقاء اللي مدة طويلة وحنا كنتسناوه".
وكان المنتخب الوطني المغربي وصل اليوم لعشية إلى المغرب قادما من قطر واحتفلو معه المغاربة ملكا وشعبا بالإنجاز اللي حقق باحتلال المركز الرابع فكأس العالم 2022، فإنجاز غير مسبوق لكرة القدم المغربية والإفريقية والعربية.