ركراكي: غادي ندخلو ضد فرنسا باش نتأهلو للفينال ماشي نفرحو بنصف النهائي ونتمناهم ما يحترموناش

اكد الناخب الوطني وليد الركراكي من جديد أن العقلية ديال اللاعبين الأفارقة خاصها التبدل، وان المنتخب الوطني المغربي غادي يدخل ماتش نصف نهائي كأس العالم قطر 2022، باش يربح ويتأهل للنهائي ماشي يكتفي بالوصول للمربع الذهبي ويفرح بهاد الانجاز.
وقال وليد الركراكي فالندوة الصحافية اللي كتسبق ماتش المغرب وفرنسا: "خاصنا نبدلو العقلية بالقارة الإفريقية وهادشي اللي قلت للعابا، راه إلى كنا فرحانين غير حيث تأهلنا لنصف نهائي كأس العالم ونعتبرو هذا نجاح فهادي هي العقلية اللي ما بغيناش"
"حنا مع 4 ديال احسن منتخبات فالعالم وماوصلناش لهاد الدور بالزهر، وغادي نحاولو نوصلو للنهائي وهادي هي العقلية ديالنا ونتمناو الخصم ما يحترمناش كيفما دارو المنتخبات اللي سبقوه، حيث إلى احترمنا غادي تكون الأمور معقدة، وحنا واثقين فريوسنا وفكل مرة كانوا كيتوقعو الإقصاء ديالنا ولكن مازالين حنا فالبطولة وراه الفرصة ديالنا كاينة".