الركراكي: الرباح ضد جورجيا مهم وما عندناش إصابات

أكد الناخب الوطني وليد الركراكي أن الرباح فاالماتش أميكال اللي لعب المنتخب الوطني المغربي ضد جورجيا مهم، والأهم هو ملي ما توعت حتى لعاب وتعطات الفرصة لاكبر عدد من اللعابا باش يبينو شنو عندهم، وعبر على التفاؤل ديالو بالمشاركة فكأس العالم قطر 2022.
وقال وليد الركراكي فتصريح لقناة الرياضي من بعدما سالا الماتش أميكال ديال المغرب ضد جورجيا بلي فحال هاد الماتش كيكون تخوف يتوعت شي لعاب ولكن ما كيناش شي إصابة وسط اللعابا، هذا هو المهم وأيضا كان المهم هو أكبر عدد منهم يلعب و ياخد الفرصة ديالو وخا ما ينين اللي عياو حيث الجو سخون وهادشي راه مزيان نشوفو قبل كأس العالم حيث فالمونديال غادي يكون النيفو طالع على ماتش اليوم.
الناخب الوطني ليد الركراكي قال بلي الأجواء مزيانة وسط اللعابا ديال المنتخب، واللعب اللي باغي هو كيدروه ولكن مازال خاصة الخدمة وباقيا 6 لأول ماتش فكوب ديموند غادي يوجدو فيها.
وختم الركراكي: "جينا للمونديال باش نفرحو المغاربة حيث عارفين بلي كأس العالم مهم لهم وكنتمناو نتاهلو للدور الثاني ولكن هاذي ماشي ساهل مع كرواتيا وبلجيكا، بالحق عندنا القيمة ديالنا والثقة فريوسنا باش نديرو شي حاجة كبيرة وبالخدمة والروح اللي عندنا غادي نفرحو المغاربة".