الركراكي دار اجتماع مع حمد الله وزياش وحكيمي باش يبعد التخاطيف من المنتخب

كشف مصدر مطلع أن الناخب الوطني وليد الركراكي دار اجتماع مع ثلاثي فالمنتخب الوطني المغربي بخصوص شكون غادي يضرب البيلانتيات والكوفرات باش ما يوقعش شي مشكل وسط لكروب، خصوصا وأن هاد القضية فايت لها دارت مشاكل وسط المنتخب وأشهرها لبلان ديال التخاطيف على البلانتي فماتش مراكش ما بين عبد الرزاق حمد الله وفيصل فجر عام 2019.
وحسب نفس المصدر فالناخب الوطني جمع كل من عبد الرزاق حمد الله وحكيم زياش وأشرف حكيمي، وتكلم معهم على الكوفرات والبيلانتيات، وشكون غادي يضربهم وأكد عليهم بلي ضروري يحترمو التعليمات ديالو حيث هو المدرب وهو اللي عندو الصلاحيات باش يختار ويكلف اللي بغا فاللعابا.
وغادي يلعب المنتخب الوطني المغربي ضد منتخب جورجيا هاد العشية مع 5 فمدينة الشارقة الإماراتية فماتش أميكال، قبل ما يرجع لقطر اللي غادي يشارك فيها فكأس العالم 2022.