مزراوي: الكروب ديالنا صعيب ولكن عندنا فرصة حيت المغرب من أقوى المنتخبات اللي مشاركة فالمونديال

أكد الدولي المغربي نصير المزراوي نجم بايرن ميونخ الالماني بلي المنتخب الوطني المغربي طاح فكروب صعيب فكأس العالم 2022، ولكن كاينا عندو فرصة باش يتأهل وراه جا هو وصحابو فليكيب ناسيونال لقطر باش يصنعو التاريخ، والمغرب من أقوى المنتخبات فالبطولة.
نصير المزراوي قال فحوار مع موقع فرقتو بايرن ميونيخ: "فالكروب ديالنا كاينا كرواتيا وصيف بطل العالم 2018 وبلجيكا اللي كانت ثالثة، داكشي علاش الدور الأول غادي يكون صعيب بزاف، ولكن راه عندنا فرصة حتى حنا فالكروب، وهادشي كيعتمد على النيفو ديالنا وأنا مقتانع بلي عندنا لاكاليتي فليكيب ناسيونال، وحنا كاملين عارفين بلي نقدرو نكتبو التاريخ".
وكمل الظهير الأيسر ديال المغرب وبايرن ميونيخ وقال: "من الناحية التقنية راه حنا من أقوى المنتخبات اللي مشاركة فكأس العالم، وعندنا لعابا شباب ولعبا عندهم الخبرة، وكينين لعبا اللي عندهم أسماء كبيرة فحال أشرف حكيمي لعاب باريس سان جيرمان حكيم زياش لعاب تشيلسي، وكاينين لعابا آخرين فحال سفيان بوفال وعبد الحميد الصبيري والكول ديالنا ياسين بونو".