الركراكي: فرحت حيث تأهلت السنغال والمدرب الإفريقي حسن من الأجنبي

أكد الناخب الوطني وليد الركراكي بلي المدربين الأفارقة بداو كيخدو الثقة فريوسهم وبلي فرح لمنتخب السنيغال والمدرب ديالو أليو سيس حيث تأهلو لثمن نهائي كأس العالم قطر 2022.
وليد الركراكي قال فالندوة الصحافية اللي كتسبق ماتش المغرب وكندا: "المنتخبات الإفريقية بدات كتيق فولاد بلادها وراه ماكينش اللي غادي يعرف اللعابا ديال دابا فحال اللعابا القدام ولاد بلادهم".
وكمل وليد الركراكي وقال: "البارح كنت فرحان بزاف للسنغال واليو سيسي حيث التأهل، وراه دازت عليه فبلادو بسبب الانتقادات وهاهو دابا اهلهم لثمن النهائي للمرة الثانية فتاريخهم".
وأكد وليد الركراكي بلي المدرب الإفريقي ملي كتوفر له الإمكانيات راه كيدير خدمة حسن من المدرب الأجنبي حيث كيكون عارف كرة بلادو مزيان.