وخا موعت.. نصير مزراوي كان حاضر فالحصة التدريبية ديال ل منتخب اليوم

حضر نصير المزراوي لعاب المنتخب الوطني المغربي فالحصة تدريبية اليوم الخميس، بدون ما يتدرب مع صحابو، حيث توعت البارح فالماتش ضد كرواتيا فأول جولة من كأس العالم قطر 2022.
نصير المزراوي كان فالحصة التدريبية هاد العشية وكتبان الحالة النفسية ديالو مزيانة وكيضحك وكان واقف كيتكلم مع حكيم زياش فالوقت اللي كان فيه زياش متكي وخدام معاه المدلك.
ومن خلال حركات نصير المزراوي ملي كان فالتيران كيبان بلي قادر يتمشى بلما يعرج او تبان عليه شي علامة ديال الألم كيفما كان واضح عليه البارح ملي توعت خرج ما كملش الماتش.
للاشارة فنصير مزراوي توعت ضد كرواتيا فجنبو ليسري وقال عبد الرزاق هيفتي طبيب المنتخب الوطني المغربي بلي دارو له فحص طبي ومازال غادي يديرو له واحد آخر باش يعرفو واش غادي يلعب ضد بلجيكا وكندا فالماتشات الجايين أو لا.