واش املاح وبوخلال والشاعر واجدين لماتش لاربعاء.. ها اش قال طبيب المنتخب واللي اكد خبار "كود"

كشف عبد الرزاق هيفتي طبيب المنتخب الوطني المغربي اليوم الاثنين أن الحالة الصحية ديال اللعابا مزيانة قبل أول ماتش ديال ليكيب ناسيونال فكأس العالم قطر 2022، واللي غادي يكون الأربعاء ضد كرواتيا، وخا كاينين بعض الإصابات الخفيفة وأكد بلي اللعابا كاملين حضرو الحصة التدريبية ديال اليوم الاثنين.
بالنسبة لسليم أملاح اللي كان موعت أكد هيفتي الخبر اللي نشر "كود" وقال: "الإصابة كانت عندو خفيفة بزاف وغادي يقدر يكون حاضر فالماتش ديال المنتخب الوطني المغربي ضد كرواتيا"
وبخصوص زكرياء أبو خلال اللي توعت مع فرقتو تولوز شي 9 أيام هادي قال هيفتي"كان جا المنتخب الوطني المغربي موعت والطاقم الطبي دار واحد المجهود كبير باش يكون جاهز وراه تقريبا واجد، يقد يغيب فالماتش الأول ضد كرواتيا ولكن غادي يكون فالماتش الثاني".
أما إلياس الشاعر فقال عبد الرزاق هيفتي بلي الطاقم التقني غادي يقرر غدا الثلاثاء، فالموعد اللي غادي يكون واجد فيه وأكد بلي الحالة الصحية ديالو تحسنت بنسبة كبيرة.