غادي يكون الدولي المغربي عبد الرزاق حمد الله مهاجم إتحاد جدة السعودي فاللائحة النهائية ديال المنتخب الوطني المغربي اللي مشارك فكأس العالم فقطر 2022، حيث اقتنع الناخب الوطني وليد الركراكي على أنه خاصاه حلول إضافية فالهجوم ديال ليكيب ناسيونال. الركراكي عندو حتى 14 من هاد الشهر باش يعلن على اللائحة النهائية المشاركة فمونديال قطر اللي غادي يبدا نهار 20 واللي المغرب غادي يلعب اول ماتش ضد كرواتيا نهار 23 مصدر مطلع كشف ل "كود أن الاعتذار ديال عبد الرزاق حمد الله مؤخرا اللي تقدم به للمغاربة والمسؤولين فالجامعة الملكية المغربية لكرة القدم على الغلط اللي دار فسنة 2019، من بعدما خرج من معسكر المنتخب الوطني المغربي، كان عندو تفاعل إيجابي داخل الجهاز الوصي على الكرة فالمغرب ولو أنه فالأصل ما كانش عند المسؤولين فالتسيير ديالو مشكل مع مهاجم إتحاد جدة، وانهم ما كيدخلوش فاختيارا الناخب الوطني وليد الركراكي فحالو فحال جميع المدربين اللي سبقوه، حيث الكلمة الأولى والأخيرة كتبقى ديال المدرب وهو المسؤول الأول على لاليست والتشكيلة. نفس المصدر وضح ل"كود" أن قرار استدعاء عبد الرزاق حمد الله للمنتخب الوطني المغربي باش يكون حاضر مع الأسود فكأس العالم المقبلة فقطر، هو كيتعلق بوليد الركراكي والطاقم التقني اللي معه وما تدخل فيهم حتى حد، وأن هاذ الفكرة بداو كيقتانعو بها منذ مدة وماشي حتى خرج مهاجم إتحاد جدة السعودي يعتذر، ولكن تبين لهم بلي خاصهم يبحثو على حلول هجومية فظل تراجع مستوى عدد من اللعابا فهجوم ليكيب ناسيونال وتخوفا من الإصابات ديال بعض المهاجمين، واحتياطا لأي مشكل يقدر يكون فلاطاك ديال الأسود، قرروا يناديو على عبد الرزاق حمد الله وياخذ الفرصة ديالو حتى هو وعلاش لا يمنح الاضافة للمنتخب وهذا هو الهدف فالأصل من الاستدعاء ديالو. وكان عبد الرزاق حمد الله اعترف بلي غلط نهار مشى من التجمع الاعدادي ديال المنتخب الوطني المغربي قبل كأس إفريقيا 2019، وقدم اعتذار للجمهور المغربي والمسوؤلين فالجامعة الملكية المغربية لكرة القدم حيث خرج من المعسكر وهز ساكو وزاد، وأكد بلي تنادم معه الحال وأنه واجد فحالة تم الاستدعاء ديالو للمشاركة فكأس العالم 2022، وشدد بلي غادي يقدم كاع داكشي اللي عندو وفحالة ما عيطش له المدرب الوليد الركراكي غادي يكون أول مشجع ليكيب ناسيونال.
