واش بصح حمد الله كيتدرب مع آسفي حيث غادي يعيط له الركراكي للمنتخب فالمونديال؟.. ها الحقيقة

نفى مصدر مطلع ل"كود" بلي الدولي المغربي عبد الرزاق حمد الله كيدرب مع الفريق ديالو السابق أولمبيك آسفي، إستعدادا للمشاركة مع المنتخب الوطني المغربي فكأس العالم 2022.
وكشف نفس المصدر ل"كود" بلي هاذشي اللي كيروج حول أن عبد الرزاق حمد الله كيتدرب مع أولمبيك آسفي غير إشاعات وما صحيحش، وأكد على أنه ما تدربش حمد الله مع الأولمبيك وما كاينش نهائيا مع الفرقة، وشدد لي ما كين حتى اتفاق ما بين الفريق المسفيوي واتحاد جدة السعودي الفرقة ديال حمد الله باش يتدرب الأخير مع آسفي.
وراجت على مواقع التواصل الإجتماعي أخبار على أن عبد الرزاق حمد الله كيتدرب مع أولمبيك آسفي بموافقة من إتحاد جدة السعودي، إستعدادا للانضمام للمنتخب الوطني المغربي اللي مشارك فكأس العالم، مع العلم أن الناخب الوطني وليد الركراكي لمح على أنه من المستبعد يشارك حمد الله مع المنتخب فمونديال فقطر، حيث قال أنه غادي يعتمد على 3 المهاجمين فقط وأنه باغي ليكيب ناسيونال تلعب بشكل جماعي ماشي تعتمد على لعاب واحد، حيث اللعاب الواحد ما كيربحش، وأكد بلي تفرج فواحد الماتش ديال حمد الله وما قنعوش.