خاليلوزيتش غايعيط لسميات جداد للمنتخب وحمد الله يقدر يكون فالماتشات ديال ليبيا والغابون

وحيد خاليلوزيتش، مدرب المنتخب المغربي غادي يعيط لسميات جداد للماتشات ديال ليبيا والغابون ف11 و15 فالشهر جاي.
مصادر “كود”، أكدت أن خاليلوزيتش غادي يعيط ابعدا على اللعابة، لي ما كانوش في الكونصونتراسيون اللخر، لحقاش كانوا مضروبين، بحال المهدي بنعطية ومروان داكوسطا واللعابة، لي كانوا مع المنتخب الوطني أقل من 23 عاما، وهم أشرف حكيمي ويوسف النصيري ونصير المزراوي إلا برا.
البوسني وحيد خاليلوزيتش ناوي هاد المرة يعيط لأسامة الأدريسي، لي كيدير ماتشات كبيرة مع أزيد ألكمار الهولندي فالدوري العولندي، ويقدر يعيط لعبد الرزاق حمد الله، هداف النصر السعودي، واخا الضجة لي أثيرت حوله بعد ما مشا من الكونصونتراسيون ديال المنتخب قبل نهائيات كأس إفريقيا، بسبب شجارو مع يونس بلهندة.
المصادر ديال “كود”، كشفت بلي المدرب خاليلوزيتش باغي يعيط گاع اللعابة، لي كايسمع عليهم، قبل ما يحدد لاليست لي غادي يعتمد عليها فالماتشات جاية.
المنتخب المغربي ظهر بمستوى متواضع فالماتشات الحبية، لي كانت أمام بوركينافاسو والنيجر فمراكش، بعدما تعادل فالماتش الاول بواحد لواحد وربح الثاني بواحد لزيرو.