خاليلوزيتش: مارادونا وبلاتيني ازكلو بيلانتيات.. وزياش ما يستاحقش نصفرو عليه

وحيد خاليلوزيتش، مدرب المنتخب الوطني، ماراضيش على التعادل أمام بوركينافاسو بواحد لواحد، لحقاش كان باغي الربح.
المدرب البوسني كان مقلق وغاضب على حكيم زياش ما شي منين ازكل البيلانتي ولكن منين صفر عليه الجمهور بالملعب. وقال في الندوة الصحافية ماعرفش علاش صفرو عليه، واضاف: خاصنا نعطيوه الثقة أكثر رآه مارادونا وبلاتيني زكلو بيلانتيات. أنا كنثيق في زياش، هو لاعب ممتاز.
ورغم التعادل امام بوركينافاسو في أول اختبار ليه مع المنتخب، إلا أن خاليلوزيتش خرج ببعض الملاحظات، من بينها أن المنتخب الوطني مازال خاصاه الخدمة باش يكون الافضل، وأضاف “اعجبني إصرار اللاعبين على التعادل، كما أن المستوى لي ظهر عليه المنتخب في الشوط الأول عجبني بزاف حيت كانت فيه فرص كثيرة ولكن ما استغليناهاش”.
وحيد خاليوزيتش تكلم على تاعرابت وگال عليه أنه لاعب ممتاز وكيعجبو، لكنه تنقصه السرعة وخاصو الخدمة.
المدرب البوسني غادي بغير التشكيلة ديالو في الماتش الثاني، لحقاش باغي يشوف كاع اللعابة لي عيط ليهم، كما ناوي يجرب اللعابة ديال البطولة باش يختبر مستواهم.