واش أشرف حكيمي حتى هو توعت في الماتش مع كرواتيا؟

كشف موقع "فوت ميركاتو" بلي الدولي المغربي أشرف حكيمي ما كملش الماتش ضد كرواتيا اليوم الأربعاء بخير، فأول جولة من كأس العالم قطر 2022.
وقال الموقع المذكور بلي أشرف حكيمي كان مبرزط فالفخذ ديالو فالشوط الثاني من الماتش ما بين المغرب وكرواتيا، وهو الماتش اللي توعت فيه الدولي المغربي الآخر نصير المزراوي وماكملوش.
للإشارة فأشرف حكيمي ما طلعش بزاف فالماتش ديال المغرب ضد كرواتيا باش يعون الهجوم وخصوصا فالشوط الثاني وهادشي كيربطوه المتتبعين اللي تفرجو فالماتش بالضغط اللي كان ديرو المنتخب الكرواتي، فانتظار يحسم الطاقم الطبي والتقني ديال المغرب الأمور ويخرجو يكشفو جاهزية اللعابا قبل ماتش بلجيكا الجاي اللي غادي يكون حاسم فمصير ليكيب ناسيونال فالمونديال.