أشرف حكيمي: غادي نديرو اللي فجهدنا باش نشرفو البلاد فكأس العالم ونفرحو المغاربة

أكد الدولي المغربي أشرف حكيمي، أنه هو والزملاء ديالو فالمنتخب الوطني المغربي غادي يديرو كاع اللي فجهدهم باش يشرفو المغرب ويفرحو المغاربة فكأس العالم قطر 2022.
اشرف حكيمي وتصريح له مع رادو "ماركا" الصبليوني قال "حنا شباب عندنا طموح، غادي نديرو شي حاجة كبيرة ونقدم أحسن ما عندنا لبلدنا، وغادي نديرو اللي فجهدنا على قبل لبلاد، هدفنا نتأهلو بعدا للدور الثاني ونمشيو ضربة ضربة".
نجم باريس سان جيرمان قال بلي كيحس هاذ المرة بالمسؤولية وهو كيشارك فكأس العالم مع المنتخب الوطني المغربي حيث هي الثانية له، وكيحس بالضغط حيث المغاربة معولين عليه وثايقين فيه هو وصحابو فليكيب ناسيونال ولكن كيشوف أن هاذشي غادي يكون حافز لهم باش يقدمو بطولة زوينة ويتخطاو فالأول دور المجموعات اللي غادي يلعبو فيها ضد كرواتيا وبلجيكا وكندا.