تيسودالي كيدعي مع المنتخب وخا ماغاديش المونديال والحدادي ماعجبوش الحال

تفاعل الدولي المغربي طارق التيسودالي اللي تحرم من المشاركة فكأس العالم 2022، بسبب الإصابة مع اللائحة ديال المنتخب الوطني المغربي اللي غادي تلعب المونديال.
طارق التيسودالي اللي ساهم فتأهل المنتخب الوطني المغربي للمونديال وحرماتو الإصابة من المشاركة معه فالعرس العالمي دعا مع الزملاء ديالو فليكيب ناسيونال من بعدما صدر وليد الركراكي اللائحة.
ونشر طارق التيسودالي صورة ديال المنتخب الوطني المغربي فسطوري فانستغرام وقال فيه: "الله تعاونكم"، فإشارة بلي غادي يشجع المنتخب وخا ما مشاركش.
وبالمقابل قام منير الحدادي بتغير صورة لانستغرام ديالو اللي لابس فيها توني المنتخب الوطني المغربي ودار صورة لابس فيها توني فريق خيطافي الصبليوني اللي كيلعب فيه من بعدما ماعيطش وليد الركراكي فإشارة بلي مقلق حيث ما غاديش يشارك فكوب ديموند، مع العلم أن الجامعة الملكية المغربية لكرة القدم وقفات معه والمغرب عطاه فرصة ثانية باش يكون لعاب دولي من بعدما تخلات الصبليون اللي فضل فالأول المنتخب ديالهم على ليكيب ناسيونال ماروكان.