ها شحال غايغيب الزنيتي من بعدما حيد المصرانة الزيدة

غادي يغيب أنس الزنيتي حارس مرمى الرجاء الرياضي اللي خضع لعملية جراحية اليوم الثلاثاء، بسبب المصرانة الزايدة لمدة على تداريب الفريق الأخضر.
مصدر مطلع كشف أن مدة الراحة اللي تعطات لأنس الزنيتي من بعدما حيد المصرانة الزيدة، ما كتقلش على 2 سيمانات، عاد يمكن له يرجع يتدرب وبالتالي فصعيب يلتحق بالمنتخب الوطني المغربي اللي كان باغي يشارك معه فكأس العالم.
وغادي يكون المنتخب دخل فالمعسكر الاعدادي بأيام على موعد عودة الزنيتي باش يدرب، وهو المعسكر اللي من المنتظر ينطلق نهار 10 فهاذ الشهر، الشي اللي كايعني بأن حظوظ "السبيدرمان" كيفما كيلقوبه الرجاويين صبحت قليلة فالسفر مع فليكيب ناسيونال لمونديال قطر.
وكان أنس الزنيتي دخل للمصحة الأحد اللي فات من بعدما جاهر كريز تبين بلي الأمر كيتعلق بتسمم غذائي، واستقرت الحالة ديالو لكن اليوم حس بالألم تبين بلي عندو المصرانة الزايدة وحيدوها له.
وفحالة غاب أنس الزنيتي على المشاركة مع المنتخب الوطني المغربي لكرة القدم فكأس العالم المقبلة فقطر، فهي ماشي أول مرة اللي كيغيب فيها حتى الآخر اللحظات على ليكيب ناسيونال فبطولة مهمة بسبب المرض، بحيث سبق لها وقعات له فكأس إفريقيا الماضية من بعدما توعت فماتش ديال الرجاء والماص، ومشى بلاصتو رضا التكناوتي كول الوداد الرياضي اللي صبح مرشح مرة أخرى وبقوة باش يكون كحارس ثالث للمغرب فكوب ديموند.