توقع الدولي المغربي السابق المهدي بنعطية يوصل المنتخب الوطني المغربي ربع نهائي كأس العالم المقبلة فقطر، ويخرج من البطولة على يد الصبليون. وكيشوف الكابيتان السابق للمنتخب الوطني المغربي أن ليكيب ناسيونال مع وليد الركراكي قادرة توصل لدور ربع نهائي كأس العالم، وتوقع فحوار على قناة الكأس القطرية، أن الأسود غادي يتأهلو من المجموعة 6، مع منتخب بلجيكا على حساب كرواتيا وكندا، وأن بلجيكا غتكون فصادارة المجموعة والمغرب غادي يكون وصيف، وهاكذا غادي يتأهل لثمن النهائي. بنعطية زاد تكهن برحلة المنتخب الوطني المغربي فمونظيال قطر، وقال باللي المسيرة ديال أسود الاطلس غادي يكون حدها الدور الثاني وغادي يلعبو ضد الصبليون اللي غاديا تقصيهم من البطولة. واستحضر المهدي بنعطية ذكريات ماتش المنتخب الوطني المغربي ضد الصبليون فكأس العالم روسيا 2018، وقال بلي الأمور كانت صعيبة بالنسبة للمنتخب الصبليوني فليكروب، أما دابا فكيتوقع أن المنتخب المغربي يواجه الصبليون فثمن النهائي وغايد يتأهلوا الصبليونيين، ووخا هكذاك فهاذشي غادي يكون مسار مشرف للأسود حيث وصلوا لثمن نهائي كأس العالم، وخا هو كيتمنى يتأهل المنتخب المغربي وقلبو كيقول المغرب اللي غادي يتكاليفا لربع النهائي من هاذ الماتش فحالة ما وقع ما بين المنتخبين فالدور الثاني من كوب ديموند، وان كلشي ممكن فماتش واحد ولكن المنطق كيقول الصبليون اللي غادي تتأهل حيث عندهم جينيراسون مزيانة.
